काठमाडौँ । सोमबारको खेलमा मैदानमै बहसमा उत्रिएका नेपाली खेलाडी सन्दीप लामिछाने र युएईका अलराउन्डर रोहन मुस्तफा एकसाथ देखिएका छन् ।
सन्दीपले सामाजिक सञ्जालमा रोहनसँग आफ्नो तस्बीर सार्बजनिक गर्दै नेपालमा स्वागत गरेका हुन् । सन्दीपले मैदानमा प्रतिष्पर्धी र मैदान बाहिर साथी भन्दै रोहनसँगको तस्वीर सार्बजनिक गरेका हुन् ।
विहिबारदेखि काठमाडौँको टियु मैदानमा हुने त्रिकोणीय सिरिजका लागि नेपालसहित युएई र पीएनजीको टिम काठमाडौँ आइपुगेको छ ।
सन्दीपले सुन्दर देश नेपालमा मुस्तफालाई स्वागत गर्दै नेपाली फ्यानहरु खुशी हुने उल्लेख गरेका छन् ।
सोमबारको खेलमा सन्दीपले रोहनलाई गरेको बलिङपछि आउटको अपिल गरेपछि रोहन रिसाएका थिए । त्यसपछि सन्दीप र रोहनबीच मैदानमा भनाभन भएको थियो ।
यसलाई खेलको क्रममा भएको सामान्य घटनाको रुपमा लिदै खेलपछि दुवैले अंकमाल समेत गरेका थिए ।
सो खेलमा नेपालले युएईलाई ४२ रनले पराजित गरेको थियो ।
