रुकुम पूर्वका २ बालिकाको हत्या आरोपमा २ बालिका पक्राउ

रुकुम पूर्व — चैत २३ गते मृत भेटिएका रुकुम पूर्वको पुथा उत्तरगंगा गाउँपालिका–३ रन्माका दुई दिदी–बहिनीको हत्यामा संलग्न भएको आरोपमा जिल्ला प्रहरी कार्यालयले दुई जना नाबालिकाहरुलाई पक्राउ गरेको जनाएको छ ।

यही चैत २१ गते मंगलबार बिहान १० बजेको समयमा सिस्नो टिप्न भनी गएका दिदीबहिनीहरु १० वर्षीया रिणा र ८ वर्षीय काली बुढा भोलिपल्ट बिहान सोही स्थानको घ्याङरजुङ जंगलको भीरमा मृत भेटिएका थिए । त्यसपछि प्रहरीले थालेको अनुसन्धानबाट घटनामा संलग्न देखिएको आरोपमा दुई जना नाबालिकाहरुलाई नियन्त्रणमा लिएको आइतबार साँझ जिल्ला प्रहरीले विज्ञप्ति जारी गरेर जानकारी दिएको छ । नियन्त्रणमा लिइएका नाबालिकाहरुलाई आइतबार नै जिल्ला अदालतबाट ५ दिनको म्याद थप गरी अनुसन्धान थालिएको विज्ञप्तिमा उल्लेख छ ।

जिल्ला प्रहरी प्रमुख प्रहरी नायब उपरीक्षक अञ्जना श्रेष्ठले अहिलेसम्मको अनुसन्धानबाट मृत नाबालिकाहरुसँग रहेको सुनका गहना लिनका लागि अरु दुई नाबालिकाहरुले उनीहरुमाथि आक्रमण गरेको र त्यसपछि हत्या गरेर भीरबाट लडाइदिएको खुलेको बताइन् । उनले भनिन्, ‘अहिलेसम्मको अनुसन्धानबाट यति कुरा खुलेको छ । यसमा अरुको पनि संलग्नता हुन सक्छ । हामी विभिन्न पाटोबाट घटनाको अनुसन्धान गरिरहेका छौं ।’