उनी २१औँ शताब्दीका सबैभन्दा सफल फुटबलर हुन् र केही खेलकुदका अर्बपतिहरूमध्ये एकमा पनि पर्छन् । उनी हुन् पोर्चुगलका ३८ वर्षीय क्रिस्टियानो रोनाल्डो, जसले जीवनमा असीम दुःखहरू पनि भोगेका छन् ।अहिले साउदी अरबको अल–नासर क्लबबाट खेल्ने रोनाल्डोले वार्षिक १ सय ७५ मिलियन पाउन्ड कमाउँछन् ।
अर्थात् उनले वर्षको २७ अर्ब ७० लाख नेपाली रुपैयाँ फुटबल खेलेरै मात्र कमाउँछन् ।उनको कमाइको कुनै सीमा छैन । उनले अनगिन्ती होटल, रेस्टुरेन्ट तथा फिट्नेस सेन्टरदेखि विमान भाडा लगाउने कम्पनी, लुगा–अत्तर र कपाल क्लिनिक व्यवसायमा लगानी गरेका छन्, जसले उनलाई फुटबल खेलेर कमाउनेभन्दा बढी प्रतिफल दिन्छ ।
वर्तमान अवस्थामा जति सफल भए पनि उनी आफ्नो पृष्ठभूमि भने भुल्दैनन् । रोनाल्डो ज्यादै गरिब परिवारमा जन्मिएका थिए । पोर्चुगलको मादेरिया टापुको फुन्चालमा जन्मिएका उनले बाल्यकालमै खान–लाउन धौधौ भएपछि सडक सफा गर्ने काम गर्थे, कैयौँपटक उनले खानाका लागि भिख पनि मागे ।
पिता जोसे डिनिस अभिरो र आमा डोलोरेस दोस सान्तोसको कोखबाट सन् १९८५ मा जन्मिएका उनी वास्तवमा अभिभावकलाई नचाहिएको बच्चा थिए । कैयौँपटक गर्भपतन गर्दा पनि उनी जन्मिएका थिए ।पिता अभिरो ज्यादै जँड्याहा थिए, पूर्व पोर्चुगिज सेना उनको युद्धमा होमिएका कारण मानसिक अवस्था ठीक थिएन ।
घरमा कमाउने कोही नहुँदा रोनाल्डोको परिवारले ज्यादै ठूलो आर्थिक संकट भोग्नुपरेको थियो ।अमेरिकी पत्रकार पियर्स मोर्गानसँगको अन्तर्वार्तामा रोनाल्डोले आफूले भोक लागेपछि खानाका लागि भिख मागेको पनि बताएका छन् । उनी भन्छन्, ‘मेरो बुबा फुटबल स्टेडियमछेउमा मालीको काम गर्नुहुन्थ्यो ।
एक दिन हामी दुवै ज्यादै भोकाएका थियौँ, पैसा थिएन । भोकले सीमा नाघेपछि हामी मकडोनाल्डको ढोका ढकढक्याउन पुगेका थियौँ ।’ज्यादै मदिरा पिउने बानीका कारण रोनाल्डोको पिताको सन् २००५ मै कलेजो बिग्रिएर मृत्यु भयो । यस कारण उनका पिताले रोनाल्डोले सफलता चुमेको कहिल्यै देख्नै पाएनन् ।
पियर्स मोर्गानसँग रोनाल्डोले भनेका छन्, ‘मैले पितालाई शतप्रतिशत चिन्ने मौका पाइनँ । तर, उहाँ जँड्याहा हुनुहुन्थ्यो । मैले उहाँलाई सामान्य अवस्थामा कहिल्यै देखिनँ भन्दा पनि हुन्छ । उहाँ जतिबेला पनि मातेको अवस्थामा देखिनुहुन्थ्यो ।’बच्चा बेलामा आफू सानो छँदा आफ्ना दाइ हुगो अभिरो र दिदीहरू एल्मा र लिलिना काटियाले आफ्नो रेखदेख गर्ने गरेको पनि रोनाल्डो सम्झिन्छन् ।
धेरै रुने हुँदा रोनाल्डोलाई दाइदिदीले रुन्चे नामै राखिदिएका थिए । सानैबाट फुटबलका पारखी रोनाल्डोले १४ वर्षको उमेरदेखि विद्यालयको शिक्षा त्यागेर आफ्नो पूरा जीवन फुटबललाई समर्पण गरिदिए । राम्रो फुटबल खेल्ने भएकाले नै १६ वर्षको उमेरमा स्पोर्टिङ सीपी क्लबले उनलाई अनुबन्ध गरेको थियो ।
अर्को वर्ष अर्थात् सन् २००३ त्यही वर्ष थियो, जसले रोनाल्डोलाई विश्वले चिन्यो ।त्यस वर्ष अगस्ट ६ मा विश्वचर्चित क्लब म्यानचेस्टर युनाइटेड र स्पोर्टिङबीच मैत्रीपूर्ण फुटबल भएको थियो । सो खेलमा रोनाल्डोले यस्तो आकर्षक खेले कि जसले चर्चित प्रशिक्षक सर एलेक्स फर्गुसन तिनछक परे ।
खेल सकिएको हप्ता दिन नपुग्दै अगस्ट १२ मा म्यानचेस्टर युनाइटेडले रोनाल्डोलाई अनुबन्ध गरिसकेको थियो ।रोनाल्डो युनाइटेड पुग्नु नै फुटबल जगत्मा उनको वर्चस्वको सुरुवात थियो जसबारे चर्चा गरिरहनुपर्दैन होला । अहिले ३८ वर्षमा पनि उनले विश्व फुटबलमा धमाका मच्चाइ रहेका छन् ।
रोनाल्डो अहिले धनाढ्य भइसके तर पनि उनमा धनको घमण्ड छैन । उनी आफ्ना छोराछोरीलाई पनि आफ्नो दुःखको कथाबारे सुनाउँछन्, जसले उनीहरूलाई नम्र र व्यावहारिक हुन सहयोग पुग्ने रोनाल्डो बताउँछन् । रोनाल्डोले एक दिन आफ्ना जेठा छोरा रोनाल्डो जुनियरलाई आफू जन्मेहुर्केको घर देखाउन पोर्चुगल लगेका थिए ।
त्यसबेला जुनियरले पिता रोनाल्डो बस्ने घर र ओछ्यान देखेर भनेका थिए, ‘बुबा, तपाईं यहाँ बस्नुहुन्थ्यो र, म विश्वास गर्न सक्दिनँ ।’दुःखमा आत्तिन र सुखमा मात्तिन हुन्न भनेर रोनाल्डोले छोराछोरीलाई सिकाइरहेका हुन् ।रोनाल्डो तीन प्रमुख परोपकारी संस्थाहरू सेभ द चिल्ड्रेन, युनिसेफ र वर्ल्ड भिजनका लागि ब्रान्ड एम्बासडर बनिसकेका छन् ।
उनको परोपकारी व्यवहारबारे सबै परिचित नै छन् । उनले विश्वभरका गरिब राष्ट्रमा अस्पताल र विद्यालय बनाउनुका साथै भूकम्पपीडितहरूलाई करोडौँ दान दिइसकेका छन् ।सन् २०११ मा रोनाल्डोले आफूले पाएको युरोपियन गोल्डेन बुट नै बेचिदिएका थिए । बुटलाई १२ लाख मिलियन पाउन्डमा बेचेर उनले युद्धग्रस्त प्यालेस्टाइनी क्षेत्र गाजामा विद्यालयहरू बनाउन सहयोग गरेका थिए ।डेलीमेल
