पोर्चुगलका कप्तान क्रिस्टियानो रोनाल्डो युरोकप फूटबल प्रतियोगिताको इतिहासमै सर्वाधिक एसिस्ट (गोलका लागि अन्तिम सहयोग) गर्ने खेलाडी बनेका छन् ।
जर्मनीमा जारी युरोकपअन्तर्गत शनिवार राति टर्कीविरुद्धको खेलमा १ एसिस्ट गरेसँगै उनले नयाँ कीर्तिमान बनाएका हुन् । रोनाल्डोको पासमा ब्रुनो फर्नान्डेसले पोर्चुगलका लागि तेस्रो गोल गरेका थिए ।
अब रोनाल्डोको नाममा ८ एसिस्ट भएको छ । युरोकपमा सर्वाधिक गोलको कीर्तिमान पनि रोनाल्डोकै नाममा छ । उनले १४ गोल गरेका छन् ।
जारी प्रतियोगिताअन्तर्गत २ खेलमा शतप्रतिशत जीत निकालेसँगै पोर्चुगल समूह विजेता बन्दै दोस्रो चरणमा पुगिसकेको छ ।
शनिवार राति डर्टमुन्डमा भएको खेलमा टर्कीमाथि ३–० गोल अन्तरको सहज जीत निकाल्दै पोर्चुगल अन्तिम १६ मा पुगेको हो ।
दुई खेलमा लगातार जीत निकालेको पोर्चुगलले ६ अंक जोडेको छ । उ एक खेलअगावै समूह ‘एफ’को विजेता बन्दै नकआउट चरणमा पुग्न सफल भएको हो ।
पोर्चुगलको जीतमा बर्नार्डो सिल्भा र ब्रुनो फर्नान्डेसले १–१ गोल गरेका थिए । पोर्चुगलले १ गोल भने उपहार पाएको थियो । टर्कीका डिफेन्डर समेट अक्यादिनले खेलको २८ औँ मिनेटमा आत्मघाती गोल गरेका हुन् ।
फर्नान्डेसले कप्तान क्रिस्टियानो रोनाल्डोको पासमा खेलको ५५ औँ मिनेटमा गोल गरेका हुन् ।
यसअघि सिल्भा खेलको २१ औँ मिनेटमा गोल गर्दै पोर्चुगललाई अग्रता दिलाएका थिए ।
समूह ‘एफ’कै खेलमा शनिबार साँझ जर्जिया र चेक गणतन्त्रले बराबरी खेलेका थिए ।
यो समूहमा एक खेलअगावै ‘हेड टू हेड’का आधारमा पोर्चुगल समूह विजेता बनेको हो । पोर्चुगलले पहिलो खेलमा चेक गणतन्त्रविरुद्ध २–१ गोल अन्तरको संघर्षपूर्ण जीत निकालेको थियो ।
यो समूहमा पोर्चुगलको ६ तथा टर्कीको ३ अंक छ । चेक गणतन्त्र र जर्जियाले भने १–१ अंक मात्र जोडेका छन् । तीनवटै टोलीको अन्तिम १६ मा जाने बाटो बन्द भएको छैन ।
