असोज २९, काठमाडौँ । गत मंगलबार सरकारले युरोपेली देश जर्मनीसँग श्रम सम्झौता गरेको छ । सम्झौता अनुसार जर्मनीले नेपाली श्रमिकहरूलाई एक वर्ष व्यावसायिक तालिम (प्रशिक्षार्थी कामदारको रुपमा) प्रदान गरी सम्बन्धित क्षेत्रमा रोजगारी दिने भएको छ ।
जर्मनीसँग भएको श्रम सम्झौताको लागि श्रम मन्त्री शरदसिंह भण्डारी नेतृत्वको टोली रोमानिया हुँदै जर्मनी पुगेको थियो । जर्मनीसँग सम्झौताको क्रममा नेपालले शुन्य लागतमै खान/बस्न सुविधा सहित सरकारी माध्यमबाट प्रशिक्षार्थी कामदारको रुपमा श्रमिक लैजाने विषयको समझदारीपत्रमा हस्ताक्षर भएको हो । श्रम मन्त्रालयले दिएको जानकारी अनुसार जर्मनीले नेपाली दक्ष कामदार लैजान तीन महिनापछि आवेदन खोल्नेछ । आवेदनपछि छनौट प्रक्रियाबाट छानिएका नेपालीहरुलाई जर्मनी गएपछि भोकेस्नल ट्रेनिङ इन्स्टिच्यूटमा आफ्नो रुचि र क्षमतानुसार प्रशिक्षार्थी कामदारको रूपमा एक वर्ष तालिम दिइने छ । उक्त तालिम अवधिको पारिश्रमिक समेत पाइनेछ । तालिम लिएपछि जर्मनीको रोजगार बजारले मागे अनुसार तिनै प्रशिक्षार्थीहरुलाई भर्ति गरिनेछ ।
युरोपेली देश जर्मनी नेपाली श्रमिकहरुको लागि सुरक्षित देश अन्तर्गत पर्छ । साथै कमाईको दृष्टिकोणले समेत राम्रो कमाई गर्न सकिने देश अन्तर्गत पर्छ । जर्मनीमा नेपाली कामदारहरुले मासिक एक लाख ८० हजारसम्म कमाई गर्न सक्नेछन् । उक्त देशमा कुन-कुन पदमा कति जना लैजाने भन्ने कुरा भने आवेदन खुलेपछि थाहा हुनेछ । तर श्रम मन्त्रालयको आंकलन अनुसार बार्षिक सात हजार कामदार जर्मनी पठाउन सकिने जनाएको छ ।
