काठमाडौं । पासपोर्टमा झारफुक गरे भिसा लाग्छ भन्ने अन्धविश्वासमा पनि हामी नेपाली पर्छौं । विदेश जाने चक्करमा तह तहका दलालहरुले त हाम्रो पैसा लुट्छन् लुट्छन्, त्यसअघि भिसा लाग्ने विश्वासमा परेर कथित माता, कथित स्वामीहरुलाई पनि हामी नै पैसा बुझाउँछौं ।
काठमाडौं शोभाभगवतीमा यस्तै अन्धविश्वासको व्यापार गरिरहेकी मनोकामना माता अर्थात जेनी श्रेष्ठको असूलीधन्दाबारे हामीले एक स्टिङ अपरेसन गरेपछि ती माता कहाँ जानेहरुको संख्या ह्वात्तै घटेको छ । यो असूली धन्दा बन्द हुने चरणमा छ ।
राहदानी झारफुक गरेर भिसा लाग्ने विश्वास बाँड्न सफल काठमाडौंकी एक कथित माताको असूली धन्दाबारे विशेष रिपोर्ट प्रशारण भएपछि अहिले अवस्था फेरिएको छ ।
काठमाडौं शोभा भगवतीस्थित माता मनोकामनाको आश्रम अहिले सुनसान प्रायः देखिएको छ ।
विदेश जाने प्रयासमा रहेका युवाको राहदानीमा यी माताले जनही १५ सय रुपैयाँ, आश्रमकै पुजा सामाग्री खरिदमा अनिवार्यता गरेर कमाउ धन्दा चलाएकी थिइन् ।
राहदानीमा समेत झारफुक गर्ने यो अनौठो धन्दाबारे कार्यक्रम सिधाकुरा जनतासँगको ९७९औं शृङ्खलामा हामीले एक रिपोर्ट प्रशारण गरेका थियौं ।
रिपोर्ट प्रशारण हुनुअघि माताको आश्रममा पासपोर्टमा झारफुक गराउनेहरुको भिड लाग्ने गथ्र्यो ।
यो क्रम अहिले नाम मात्रैको छ । अर्को शब्दमा भन्ने हो भने अन्धविश्वासको यो धन्दा अब बन्द हुने चरणमा पुगेको छ ।
हाम्रो रिपोर्ट प्रशारण हुनुअघि दैनिक २५ सय जति मानिसहरु यहाँ पुग्थे । यो संख्या घटेर अहिले सयको हाराहारीमा पुगेको छ ।
वास्तविक नाम जेनी श्रेष्ठ भए पनि यी महिला यसबीच ‘मनोकामना माता’को उपनामले चर्चित थिइन् ।
राहदानीमा झारफुक गराउँदा भिसा लाग्ने विश्वास यीनले टिकटकमा भिडियो अपलोड गरेर आर्जन गरेकी थिइन् ।
पासपोर्टमा माताले छोएपछि भिसा लाग्ने, भाकल गरेर पैसा चढाए मनका कामनाहरु पूरा हुने भ्रम छरिएको थियो । माताको प्रभावकै कारण भिसा लागेका कुनै तथ्यांक र प्रमाण भने सार्वजनिक भएका थिएनन् ।
माता कहाँ १५ सय बुझाएर पासपोर्ट झारफुक गराउँदा भिसा लाग्ने अन्धविश्वासमा परेर धेरै सर्वसाधारण यहाँ पुग्ने गरेका थिए ।
हाम्रो स्टिङ अपरेसनका क्रममा हामीसँग पनि १५ सय रुपैयाँ मागिएको थियो ।
यो प्रकरणको पहिलो श्रृङख्लाका बेला पनि हामीले जेनी श्रेष्ठसँग कुराकानी गर्ने प्रयास गरेका थियौं । तर उनका पतिले उनको भोकल कर्डमा समस्या रहेको बताएका थिए ।
अहिले फलोअपमा हामी त्यहाँ पुग्दा पनि भोकल कर्डमै समस्या रहेको भन्दै आफ्नी पत्नीलाई हाम्रो क्यामेराबाट परै राखे ।
जवाफमा जेनीका पति रामकुमार खड्गीले शुल्क तोकेर रकम असूली नगरिएको जिकिर गरे ।
तर आश्रमका कर्मचारीले शुल्क १५ सय नै भएको हामीलाई बताएका थिए । सो अडियो हामीले अघिल्लो शृंखलामा प्रशारण पनि गरेका थियौं ।
शुल्क तोकेर असुली धन्दाको खुलासा गर्ने कर्मचारीलाई चाहिँ कामबाट निष्कासन गरिएको हामीले यसपटक जाँदा थाहा पायौं ।
रामकुमारले १५ सय शुल्कबारे जानकारी दिने व्यक्तिलाई आफूले नचिन्ने र ति आफ्ना कर्मचारी नभएको भन्दै बचाउमा उत्रिए ।
म्याद गुज्रिसकेको र कतै भिसाका लागि आवेदन समेत नदिएको यो पासपोर्ट लिएर माता कहाँ हामी पुगेका थियौँ ।
माताले डेट एक्स्पाएर भइसकेका पासपार्टबाट १५ सय रुपैयाँ निकाल्छिन् । अनि उनले ‘कुन देश जाने ? ’ भन्ने प्रश्न गर्छिन् । हामीले अष्ट्रेलिया भन्न नपाई उनले हाम्रो लागि गरिदिने पूजाआजा सिध्याउँछिन् ।
जेनीका पतिले श्रद्धालुको अनुहार हेरेर भविष्यवाणी गर्ने भएकोले राहदानीको मिति हेरिरहन आवश्यक नभएको बताउँछन् ।
जेनी र उनका पति रामकुमारले सर्वसाधारणलाई माता कहाँ पासपोर्ट झारफूक गराएपछि भिसा लागेको भन्ने बोल्न लगाएर टिकटिकमा अपलोड गर्दै आएका थिए । टिकटकमा समेत भ्रामक सन्देश फैल्याएका यी दम्पत्ती अहिले पनि आफूहरुको कामले ‘पासपोर्टमा भिसा लाग्ने वा नलाग्ने तय नहुने’ भन्न सकिरहेका छैनन् ।
(भिडियो)
