टेलिभिजनकर्मी ऋषि धमला र आफूलाई अभियन्ता दाबी गर्ने शर्मिला वाइबाबीचको ‘लफडा’मा छिरेर केही युट्युबरले पैसा ‘बार्गेनिङ’ गरेको खुलासा भएको छ ।
हालै युट्युबमा सार्वजनिक अडियोअनुसार, एक युट्युबरले धमलासँग लाखौँ रुपैयाँ मागेको खुलेको हो । आफूलाई पत्रकार बताउने मनोजकुमार महतो उर्फ मनोज मानव नामका युट्युबरले धमलालाई गोप्य भिडियो सार्वजनिक गर्ने धम्की दिँदै ‘ब्ल्याकमेलिङ’ गरेको अडियोबाट प्रस्ट हुन्छ । सिराहाका महतो काठमाडौंमा स्टार अनलाइन टीभी नामको युट्युब च्यानलका लागि भिडियो बनाउँछन् ।
आफूलाई पीडित बताउने शर्मिलासँगको संवादमा युट्युबरले पैसा पाएको आधा घण्टामै युट्युबबाट भिडियो डिलिट गरिदिने बताएका छन् । ‘भिडियो नहाली धमलाले टेर्दैन क्या । सबुतसहित हाल्दिऊँ न सिध्याइदिऊँ । त्यसले आखिर तपाईंलाई केही गर्ने होइन’, मनोजले यति भनेपछि शर्मिलाले ‘भिडियो हालेर समाधान छ त ?’ भनेर साधेकी छन् ।
जवाफमा मनोजले भनेका छन्, ‘आधा घण्टामा उडाइदिऊँला नि त्यो भिडियो । फेरि म सबै ठाउँबाट डिलिट गर्न लाइदिन्छु नि पैसा पाएपछि । तर एउटा सबुत पनि चाहियो क्या, केही न केही ।’
आफूलाई ‘जनयुद्ध’को घाइते दाबी गर्ने नरनाथ गौतम नामका व्यक्तिले समेत धमलासँग ‘बार्गेनिङ’ गरेको भिडियो सार्वजनिक भएको थियो । ‘शर्मिला वाइबासँगको सेक्स भिडियो मसम्म आइपुग्यो, के गरौँ’ भन्दै उनले धमलालाई फोन गरेका थिए । पछि उनले आफूले धमलालाई जानकारी मात्रै गराएको बताएका थिए । यति मात्र हाेइन, धमलापत्नी एलिजा गाैतमलाई समेत कतिपयले तनाव दिएको शर्मिला-मनोज संवादको अडियोबाट बुझ्न सकिन्छ ।
यसले के देखाउँछ भने केही युट्युबरले धमला र शर्मिलाको व्यक्तिगत विवादमा छिरेर ‘बार्गेनिङ’ गरिरहेका छन् । तीन दिनअघि फेसबुक लाइभमार्फत शर्मिलाले आफूहरूबीचको विवादमा पसेर युट्युबरहरूले पैसा मागिरहेको बताएकी थिइन् । विवाह गर्छु भनेर धमलाले आफूसँग सम्बन्ध बनाएको आरोप लगाएकी वाइबाले लगत्तै बोली फेर्दै आफूहरूबीच लेनदेनको विवाद मात्रै रहेको बताएकी थिइन् । धमलाले पनि विवाद लेनदेनको मात्रै भएको बताएका छन् । यसबीचमा गोप्य भिडियो हाल्दिने धम्की दिँदै युट्युबरदेखि आफूलाई अभियन्ता दाबी गर्ने कतिपय व्यक्तिसम्मले धमलासँग बार्गेनिङ गरेका हुन् ।
युट्युब च्यानल बीजी टीभीमार्फत सार्वजनिक पछिल्लो अडियोमा मनोज र शर्मिलाबीचको संवाद सुन्न सकिन्छ । मनोज तिनै युट्युबर हुन्, जसले धमलामाथि आरोप लगाइएको शर्मिलाको भिडियो सुरुमा युट्युबमा प्रसारण गरेका थिए ।
सार्वजनिक अडियोमा वाइबा भनिरहेकी छन्, ‘भिडियोहरू नहाल्ने सर्तमा वकिल राखेर मिलेका छौँ ।’ तर मनोजले सबुतसहित भिडियो राखेर धमलालाई सिध्याइदिने बताएका छन् ।
यस्तो छ संवादः
bargening1679224351.PNGस्क्रिनसटः बिजी टीभीकाे युट्युब च्यानलबाट ।
मनोजः भिडियो नहाली धमलाले टेर्दैन क्या । सबुतसहित हाल्दिऊँ न सिध्यादिऊँ । त्यसले आखिर तपाईंलाई केही गर्ने होइन ।
शर्मिलाः अनि भिडियो हालेर समाधान छ त नि ?
मनोजः आधा घण्टामा उडाइदिऊँला नि त्यो भिडियो । फेरि म सबै ठाउँबाट डिलिट गर्न लाइदिन्छु नि पैसा पाएपछि । तर, एउटा सबुत पनि चाहियो क्या, केही न केही ।
शर्मिलाः त्यही त मान्दैन होला । फेरि अर्को उग्र हुने हो कि !
मनाेजः हुँदैन । सुन्नाेस् यसो गरौँ, मेरो अफिस आउन सक्नुहुन्छ १५/२० मिनेटमा ?
शर्मिलाः फेरि भिडियो हालेर भोलि… !
मनाेजः होइन, म त्यो धमलासँग डराउँदिनँ हेर्नुस् । मैले पनि टेन्सन खपिसकेँ । मैले पनि आफ्नो सल्लाह गरिसकेँ । त्यो धमलाको मात्रै पावर छैन, मेरो पनि छ । तपाईं १५ देखि २० मिनेटमा आउनुहुन्छ भने आउनुस् ।
शर्मिलाः सुन्नु त, भिडियो नहाल्ने भनेर त्यत्रो वकिल राखेर कागज गरेको छ नि त !
मनाेजः बुझेँ कि बुझेँ । त्यसैले त तपाईंको सल्लाह लिँदैछु । तपाईं यहाँ आउनुस् । त्यसको अफिस म किन जानु ? अफिसमा सीसी क्यामेराहरू हुन्छ ।
शर्मिलाः तपाईंले त्यो भिडियो हाल्यो भने त मलाई पनि गाह्रो हुन्छ, उसलाई पनि गाह्रो हुन्छ ।
मनाेजः त्यो त हो कि.. । तर अस्ति तपाईं हामीलाई बोलाएर त्यसले किन नभेटेको त ?
शर्मिलाः होइन बीजी भएर होला नि त ! तपाईंहरू साथीसाथी तपाईं आफैं कुरा गर्नु न एकचोटि ।
मनाेजः अब मैले के…, तपाईं आउनु न १५ देखि २० मिनेटमा मेरो अफिसमा ।
शर्मिलाः भिडियोचाहिँ नहाल्नु नि । त्यो हालेर केही काम छैन । एकचोटि सल्लाह गर्नु, कुरा गर्नु के हुन्छ । लिनुपर्ने पैसा मेरो हो । अरुअरुले ऋषि धमलालाई फोन गर्दै पैसा मागिरहेका छन्, ए, यस्तो भिडियो छ उस्तो भिडियो छ हाल्दिन्छु भन्दै । त्यस्तो गर्ने होइन नि त !
मनाेजः अरुसँग भिडियो छैन कहाँबाट हाल्नु ।
शर्मिलाः होइन, त्यो नरनाथ गौतमले क्या, यस्तो यस्तो भिडियो आको छ के गर्ने भन्दै धम्क्याइरहेको छ ।
मनाेजः एलिजालाई पनि फोन गरिसको ?
शर्मिलाः अँ, एलिजालाई पनि फोन गरिसक्यो रे । मलाईचैँ गरेको छैन । नरनाथ गौतमले चैँ फोन गरिसक्यो रे ।
मनाेजः म त हाँसेर हैरान छु । अनि एलिजाले तपाईंलाई भनी ?
शर्मिलाः मलाई त दिदीले भनेको । मैले त्यस्तो नगर्दिऊँ भनेको । ऋषि धमलालाई पक्राएर पाउने केही होइन के, विचरा ।
मनाेजः यसो गरौँ, मैले कुरा बुझेँ । तपाई १५/२० मिनेटमा यहाँ मेरो अफिस आउनु न ।
शर्मिलाः ल ।
मनाेजः यहाँ सुन्नु न, अर्को मोबाइलमा यहाँ ऋषिको फोन आयो । उसलाई नि बोलाउँछु म यहाँ ।
शर्मिलाः कसलाई ?
मनाेजः ऋषि धमलालाई ।
शर्मिलाः कल गर्यो तपाईंलाई ?
मनाेजः अँ गर्दैछ, म उसलाई पनि यही अफिसमा बोलाउँछु । तपाईं आउनुस् ।
सार्वजनिक अडियोबारे युट्युबर मनोजको माेबाइल ९८५१३१२..७ र ९८४४१८..१९ नम्बरमा सम्पर्क गर्न खाेज्दा स्वीच अफ भन्यो । शर्मिलाले भने फेसबुक लाइभमार्फत नै आफूलाई मनोजसहितका युट्युबरले अप्ठेरोमा पारेको गुनासो गरेकी थिइन् । युट्युबमा नहाल्ने भनेर खिचिएको भिडियो हालेर मनोजले धमलासँग बार्गेनिङ गरेको उनको आरोप छ ।
ऋषि-शर्मिला लफडा कसरी बाहिरियाे ?
गत २२ माघमा राष्ट्रिय स्वतन्त्र पार्टीको पत्रकार सम्मेलनमा सभापति रवि लामिछाने मिडिया र केही पत्रकारमाथि खनिए । त्यस क्रममा उनले धमलालाई जोकरको संज्ञा दिए । धमलाले कतिपय विषयमा ‘बार्गेनिङ’ गर्ने गरेको दाबी पनि लामिछानेले गरेका थिए ।
त्यही दिन राति प्राइम टीभीबाटै धमलाले लामिछानेलाई जवाफ दिए । आफूलाई १ सय ३ डिग्रीको ज्वरो आएको छ भन्दै टीभीमा देखिएका धमलाले रविलाई चुनौती दिएका थिए, ‘आफूले बार्गेनिङ गरेको वा गल्ती गरेको प्रमाण ल्याए पत्रकारिता छोडिदिन्छु ।’
त्यसैको भोलिपल्ट शर्मिलाले धमलाको पोल खोलिदिने भन्दै फेसबुकमा स्टाटस लेखेकी थिइन् । त्यसपछि युट्युब अन्तर्वार्ता दिँदै उनले विवाह गर्ने आश्वासनमा धमलाले आफूसँग वर्षौंदेखि शारीरिक सम्बन्ध राखेको बताएकी थिइन् । लगत्तै, उनले आफू र धमलाबीच लेनदेन विवाद मात्रै रहेको भन्दै बोली फेरिन् ।
यसबीचमा युट्युबरले ‘काजु काण्ड’ भनेर धमला र शर्मिलाबीचको व्यक्तिगत विषयलाई ‘भाइरल’ मात्रै बनाएका छैनन्, त्यसले नपुगेर केही युट्युबले दुवै पक्षसँग बार्गेनिङ समेत गरिरहेका छन् । केही दिनअघि आत्महत्याको प्रयास गरेकाेभन्दै शर्मिलालाई अचेत अवस्थामा अस्पताल पुर्याइएको थियो । उसाे त, धमला र शर्मिलाबीच मिलाप गराएका सन्तोष देउजासमेत तनावमा छन् । केही युट्युबरले देउजाका बारेमा अश्लील थम्बनेल र हेडलाइन राखेर भिडियो बनाएका छन् ।
हैरान धमला
‘यतिसम्म चरित्र हत्या हुँदा कानुनी कारबाहीमा किन नजानुभएको ?’
यसअघि फोनमा खुलेर बोल्ने धमला अचेल अलि ‘सजग’ सुनिन थालेका छन् । उनले भेटेरै प्रतिक्रिया दिने बताए । यद्यपि, पछिल्लोपल्ट आफूलाई बार्गेनिङ गर्नेहरूले हैरान पारेको भने उनले लुकाएनन् । ‘हामीबीच लेनदेनको मात्रै विवाद हो । यसलाई कसरी समाधान गर्ने भन्नेमा हामी सहमत भइसकेका छौँ । युट्युबतिर के आयो, मैले हेर्न भ्याएको छैन । उनीहरूसँग विवाद गरेर कुनै उपलब्धि हुन्छजस्तो पनि लाग्दैन’, धमलाले यति नै भने ।
