६४ जनाको मृत्यु भएको पुष्टि, कोही जीवित भेटिएनन्

काठमाडौं । पोखरामा भएको यती एयरलाइन्सको दुर्घटनामा परी अहिलेसम्म ६४ जनाको मृत्यु भएको पुष्टि भएको छ ।

कास्कीका प्रहरी प्रमुख एसपी अजय केसीका अनुसार अहिलेसम्म ६४ जनाको भेटिएको छ । तर, उनीहरुको पहिचान भने भइसकेको छैन ।

एसपी केसीले भने– ‘अहिलेसम्म ३० जनाको शव अस्पताल पुर्‍याइसकेका छौं । बाँकी ३४ जनाको शव खोंचमा भेटिएका छन् ।’

३० जनाको शव ३ सय मिटर गहिरो खोंच भएकाले निकाल्न समस्या भएको उनले जानकारी दिएका छन् ।

एसपी केसीका अनुसार अहिलेसम्म कसैलाई पनि जीवित भेटिएका छैनन् ।

जहाजमा चालक दलका ४ सदस्यसहित ७२ जना सवार थिए ।

भीड बढेर उद्दार प्रभावित हुने भएपछि प्रधानमन्त्री पोखरा नजाने

भीड बढेर उद्दार प्रभावित हुने भए पछि प्रधानमन्त्री पुष्पकमल दाहाल ‘प्रचण्ड’ यति एयरको दुर्घटनाग्रस्त क्षेत्र निरिक्षण गर्न पोखरा नजाने भएका छन् ।

उपप्रधानमन्त्री तथा गृहमन्त्री रवि लामिछानेले अनुसार आफूहरु जाँदा उद्दार प्रभावित हुन सक्ने देखिएकाले नजाने निर्णय गरिएको जानकारी दिए ।

केही बेर अघि सम्पन्न मन्त्रिपरिषद बैठकले प्रधानमन्त्री प्रचण्ड, उपप्रधानमन्त्री नारायणकाजी श्रेष्ठ, उपप्रधानमन्त्री लामिछानेसहितको टोली नेपाली सेनाको हेलिकप्टरबाट पोखरा जाने निर्णय गरेको थियो ।

प्रधानमन्त्री नेतृत्वको टोली पोखरा जाने भए पछि नेपाली सेनाको हेलिकम्पुर बालुवाटार पुगेको थियो । तर, प्रधानमन्त्री नेतृत्वको टोली तत्काल नजाने भएपछि फर्केको छ ।