विश्वमै फस्टाएको सिरिज फिल्मको खेती नेपालमा पनि गज्जबले मौलाइरहेको छ । हिट फिल्मको नामलाई दुहुनो गाईं बनाएर पैसा छाप्न मेकरहरुबीच प्रतिस्पर्धा नै चलेको अवस्था छ । दर्शकहरुले पनि सिरिज फिल्मप्रति बढी विश्वास गरेको देखिन्छ । यसैले केही वर्षयता सिरिज फिल्मको निर्माणमा बाढी आएको छ । ‘सेल्फ ल्यान्डिङ’का लागि पनि सिरिज फिल्म मेकरको रोजाईमा पर्ने गर्छ ।
एक समयका सफल निर्देशक तथा निर्माता नरेश पौडेलले पनि झन्डै १९ वर्ष अगाडिको ब्लकबस्टर फिल्म ‘धड्कन’लाई सिरिजको रुपमा अगाडि बढाउँदैछन् । निखिल उप्रेती, रेखा थापा, रमित ढुंगाना, अरुणिमा लम्सालको मुख्य भूमिका रहेको फिल्मको दोस्रो सिरिजमा भने नरेशले नयाँ अनुहारलाई ब्रेक दिँदैछन् । अहिले उनी फिल्मका लागि एक नायक र दुई नायिका खोजिरहेका छन् ।
फिल्ममा नयाँ अनुहार लिन लाग्नुको कारणबारे उनले भने, ‘मैले यसअघि पनि धेरै फिल्ममा स्थापित नभएका कलाकारलाई लिएर फिल्म बनाएको छु । यसपटक पनि म नयाँ अनुहार लिँदैछु र उनीहरु स्थापित हुनेछन् ।’ उनले फिल्ममा अभिनेत्री सञ्चिता लुइँटेल अनुबन्ध भइसकेको जानकारी दिए । फिल्ममा उनको उमेरअनुसार एकदमै सशक्त भूमिका रहेको निर्देशक पौडेलको दाबी छ ।
आगामी फागुन वा चैतबाट छायांकन सुरु हुने फिल्मको प्रायः छायांकन नेपालगञ्जमा हुनेछ भने गीतको छायांकन पर्यटकीय नगरी पोखरामा गर्ने योजनामा पौडेल छन् । अहिले उनी ‘लोकेशन हन्टिङ’का लागि पोखरामा छन् । फिल्ममा उनी स्वयंले पनि अभिनय गर्दैछन् । पौडेल स्वयम्को निर्देशन तथा निर्माण रहने यस फिल्मको गीतमा सुरेश अधिकारीले संगीत भर्ने जिम्मेवारी पाएका छन् ।
