गुण्डा नाइके रमेश लामा ‘चाईनिज’लाई छुटाउन एमालेको एउटा गिरोह सक्रिय

काठमाडौं । सिन्धुपाल्चोक जिल्लाको सुकुटेमा नेपाली कांग्रेसका स्थानीय नेता धनबहादुर कार्की ‘बलराम’लाई अपहरण गरेको अभियोगमा पक्राउ परेका गुण्डा नाइके रमेश लामा ‘चाईनिज’लाई छुटाउन एमालेको एउटा गिरोह सक्रिय भएर लागेको छ ।

‘चाईनिज’को मुद्दालाई सिन्धुपाल्चोक प्रहरीले सरकारी वकिलको कार्यालयमा बुझाएको छ । गुण्डा नाइके ‘चाईनिज’लाई छुटाउन र मुद्दा कमजोर बनाउन एमालेका स्थानीय नेताहरू पैसाको खोलो बगाउनेभन्दै हिँड्ने गरेको पीडित पक्षको आरोप छ । एमालेका नेताहरूले गुण्डा नाइके ‘चाईनिज’लाई जसरी पनि छुटाउने र पैसाको खोलो बगाउने भनेर हिँडेपछि पीडित न्याय नपाइने हो कि भनेर डराएको छ ।

‘चाईनिज’विरुद्ध प्रहरीले शरीरबन्धक तथा अपहरण मुद्दाको अभियोग लगाएको छ ।

सम्भवत सरकारी वकिलको कार्यालयले सोमबार जिल्ला अदालत सिन्धुपाल्चोकमा ‘चाइनिज’ मुद्दा दर्ता गर्ने र थुनछेकको बहस हुनेछ । पीडित पक्ष अदालतबाट न्याय पाउनेमा आशावादी भएर बसेको छ । पछिल्लो समय न्यायालयले आफूलाई जबरजस्त रुपमा पीडितको पक्षमा उभ्याउँदै आएको छ । प्रधानन्यायाधीश चालेन्द्रशम्शेर जबरामाथि महाअभियोग लागेर निलम्बनमा परेपछि न्यायपालिकामाथि जनताको आशा झन् बढेर गएको छ ।

यसअघि, प्रहरीले एमाले र माओवादी केन्द्रका ४ जना स्थानीय नेताहरूविरुद्ध कांग्रेस नेता कार्कीलाई अपहरण गरेको अभियोगमा पक्राउ पुर्जी जारी गरेको थियो ।

अपहरण तथा शरीर बन्धकमा कार्कीले सुनकोशी गाउँपालिकाका एमालेका स्थानीय कार्यकर्ता रमेश लामा ‘चाइनिज’, सदाबहार बोर्डिङ स्कुलका सञ्चालक दिनेश थापा, उमेश खड्का र माओवादीका अमर लामाविरुद्ध किटानी जाहेरी दिएका थिए । गुण्डा नाइके ‘चाईनिज’ पक्राउ परे पनि अरु फरार छन् । फरार हुनेमा टपेन्द्र तिमिल्सिना, अमर लामा, दिनेश थापा र उमेश खड्का लगायतका व्यक्तिहरू छन् ।

कार्कीको किटानी जाहेरपछि चार जनाविरुद्ध जिल्ला अदालत सिन्धुपाल्चोकबाट पक्राउ पुर्जीको आदेश लिएको जिल्ला प्रहरी कार्यालय सिन्धुपाल्चोकका प्रहरी प्रमुख (एसपी) रामेश्वर यादवले जानकारी दिएका छन् ।

कांग्रेस नेता कार्कीर्लाइ अपहरण गरेको अभियोगमा परेका सबै व्यक्तिहरू सुनकोशी गाउँपालिकाका हुन् ।

अपहरणमा मुछिएका मध्येका अमर लामा माओवादी केन्द्रको सुनकोशी गाउँपालिकाका अध्यक्ष समेत हुन् ।

रमेश लामा ‘चाइनिज’को नेतृत्वमा वैशाख २६ गते दलबलसहित आएको ‘ग्याङ’ले कांग्रेसका नेता कार्कीलाई सुकुटेको बजारमा चियापसलमा चिया खाइरहेका बेला बिहान करीव ६ बजे जरजस्ती स्कार्पियो गाडीमा हालेर लगेको जाहेरीमा उल्लेख छ ।

अपहरणका क्रममा कांग्रेसका नेता कार्की जान नमानेपछि ‘चाइनिज’ र उनीसँगै आएको ग्याङले ‘टपेन्द्र तिमिल्सिनाले बोलाउनुभएको छ’भन्दै जबरजस्ती गाडीमा राखेको उजुरीमा उल्लेख छ ।

कार्कीलाई अपहरण गरेर चाइनिजको ग्याङले सदाबहार बोर्डिङ स्कुलमा करीव ६/७ घण्टा बन्धक बनाएर राखेको आरोप छ ।
कार्की अपहरणमा परेको जानकारी पाएपछि स्थानीय र प्रहरीले कार्कीलाई उद्धार गरेका थिए ।

पक्राउ परेका गुण्डा नाइके ‘चाइनिज’ विभिन्न अपराधमा संलग्न भएका र पटक–पटक पक्राउ परेका विवादित व्यक्ति हुन् ।

‘चाइनिज’ले करीव १५ वर्ष अगाडि जेलमा रहेका गुण्डा नाइके सुजन पौडेल ‘रमेश बाहुन’की सानी छोरीलाई काठमाडौंमा अपहरण गरेका थिए । ती बालिकालाई चक्रपथमा राखिएको थियो । बालिका भागेर प्रहरीको सम्पर्कमा पुगेकी थिइन् ।

पछि ‘चाइनिज’को ग्याङले महाराजगञ्जका प्रहरी प्रमुख र अन्य व्यक्तिहरूसँग सेटिङ मिलाएर रमेश बहुनकै पत्नीलाई विभिन्न आरोप लगाएर पक्राउ गराएका थिए । रमेश बाहुनकी पत्नीले पछि अदालतबाट न्याय पाएकी थिइन् ।

‘चाइनिज’लाई रमेश बाहुनसँगको विवाद सिन्धुपाल्चोककै सगुन श्रेष्ठसहितको ग्याङले मिलाइदिएको थियो ।

‘चाइनिज’का धेरै काण्डहरू प्रहरीमा दर्ज छन् । प्रहरीको हिट सूचीमा ‘चाइनिज’को नाम छ । गुण्डा नाइके ‘चाइनिज’लाई छुटाउन एमालेका नेताहरू हातधोएर लागेपछि पीडितहरू झन् त्रसिएका छन् ।