चर्चित फेसन ब्राण्डहरु आफ्ना उत्पादन मार्फत् विभिन्न अनौठा आइडियाहरु ल्याउँछन् । कहिलेकाही ती आइडियाहरू यतिधेरै अजीव हुन्छन् कि मान्छेले केही भेउ नै पाउँदैनन् । यसपटक लक्जरी फेसन ब्राण्ड ब्यालेन्सिआगा पनि यस्तै कदमका कारण चर्चाको शिखरमा पुगेको छ ।
कम्पनीले एउटा यस्तो बहुमूल्य ब्रासलेट बजारमा ल्याएको छ जुन ठ्याक्कै बाइन्डिंग टेपजस्तो देखिन्छ । पारदर्शी टेपजस्तो देखिने यो ब्रासलेटमा ब्यालेन्सिआगाको लोगो देखिन्छ ।हालै पेरिस फेसन सप्ताहको फल/विन्टर कलेक्सनका क्रममा यही महिनाको सुरुवातमा यो अनौठो ब्रासलेट लञ्च गरिएको हो । यसको मूल्य ४ हजार डलर वा झण्डै साढे ५ लाख रुपैयाँ रहेको छ।
मिडिया ब्राण्ड हाइस्नोबिटीले यो ब्रासलेटको एउटा टिकटक क्लिप तथा इन्स्टाग्राम रील अपलोड गरेपछि यसको चर्चा चुलिएको हो ।यसले इन्टरनेट प्रयोगकर्तालाई आश्चर्यमा पारेको छ र मानिसहरुले यसको निकै खिल्ली उडाइरहेका छन् । उनीहरुले टेपजस्तो ब्रासलेटको मूल्य ४ हजार डलर हुनु पागलपन रहेको बताएका छन् ।
यद्यपि कम्पनीको वेबसाइटमा यो सामान हाल बिक्रीका लागि उपलब्ध छैन र यसको बिक्री मूल्य कति राखिनेछ भन्ने बारेमा पनि ब्यालेन्सिआगाले पनि केही बताएको छैन ।स्मरण रहोस् अनौठा सामान बनाउनमा यो कम्पनी अगाडि छ । यसअघि उसले टावेल स्कर्ट लञ्च गरेको थियो, जसको मूल्य करिब एक लाख ३० हजार रुपैयाँ थियो ।
