मन्त्री किरातीलाई पितृ शोक

काठमाडौं । संस्कृति, पर्यटन तथा नागरिक उड्डयनमन्त्री सुदन किरातीलाई पितृ शोक परेको छ । उनका बुवा हर्कबहादुर राईको ७६ वर्षको उमेरमा निधन भएको हो । राईको आज बिहान वीर अस्पतालमा निधन भएको मन्त्री किरातीको सचिवालयले जनाएको छ ।

मन्त्री किराती स्वयंले आफ्नो बुवाको मृत्युबारे सामाजिक सञ्जाल फेसबुकमार्फत जानकारी दिएका छन् ।

यसैबीच, प्रधानमन्त्री पुष्पकमल दाहाल ‘प्रचण्ड’ले राईको मृत्युमा दुःख व्यक्ति गरेका छन् । “संस्कृति, पर्यटन तथा नागरिक उड्डयनमन्त्री सुदन किरातीका बुवा हर्कबहादुर राईको ७६ वर्षको उमेरमा दुखद् निधन भएकोमा उहाँप्रति हार्दिक श्रद्धाञ्जली व्यक्त गर्दछु । दुःखको यस घडीमा शोक सन्तप्त परिवार, आफन्त र शुभेच्छुकहरूमा गहिरो समवेदना प्रकट गर्दछु,” प्रधानमन्त्री प्रचण्डले सामाजिक सञ्जालमा लेखेका छन् ।