काठमाडौं । अर्बपति ब्यवसायी विनोद चौधरीले आफूले एक वर्षमा कमाउने पैसा कलाकार दयाहाङ राईले एउटै चलचित्रबाट कमाउछन् होला भनेर अनुमान गरेका छन् ।सामाजिक सञ्जाल एक्समा चौधरीले चलचित्र डिग्री माइलाको भिडियो क्लिप सेयर गर्दै लेखेका छन्, ‘मैले एक वर्षमा कमाउने त तपाईंले यही एउटै फिल्मबाट कमाउनुहुन्छ होला जस्तै छ त दयाहाङ जी । हैट !’
चलचित्रको उक्त क्लिपमा दुई कलाकार दयाहाङ राई र माओत्से गुरुङबीचको संवाद छ । जसमा राईले सिजीमा जागिरको अफर आए पनि नखाएको बताउँछन् ।गुरुङ राईलाई किन जागिर नखाएको त भनेर सोध्छन् । जवाफमा राइ भन्छन्, चौधरी आफैं धनी छ, धनी माथि धनी के बनाउनु?
दयाहाङ राई र माओत्से गुरुङबीचको संवाद
राईः त्यो सिजी ग्रुप सुन्या छौ… चाउचाउ बनाउँछ नी
त्यसले मलाई मासिक ४ लाखको अफर गरेको थ्यो ।
गुरुङः तैले किन खाइनस् त ?
राईः अब चौधरी आफैं धनी छ,धनी माथि धनी के बनाउनु
यो चलचित्र २०८१ सालको नयाँ वर्षमा प्रदर्शनमा आउने निर्माताले जनाएका छन् ।
बाँसुरी फिल्म्सको ब्यानरमा निर्माण भएको फिल्मले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा भन्छ । यही नाममाथि अभिनेता दयाको निर्देशनमा केही वर्षअगाडि नाटकसमेत प्रदर्शन भइसकेको छ। सोही नाटकलाई फिल्मका रूपमा पर्दामा प्रस्तुत गर्न लागेको हो ।
फिल्ममा दयासँगै आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरेलगायत कलाकारको अभिनय रहनेछ।
मैले एक बर्समा कमाउने त तपाईंले यहि एउटै फिल्मबाट कमाउनुहुन्छ होला जस्तै छ त दयाहाङ जी। हैट ! @dayahangrai pic.twitter.com/rBLhhCCCk5
— Binod Chaudhary (@BinodKChaudhary) March 1, 2024
