यी १० नेपाली कलाकारहरु बलिउडमा चम्किएर अरबौँ धन र अरबौँको मन जितेका छन् । को को ति कलाकारहरु आज हामी चर्चा गर्ने छौ…

काठमाडौं। कलाको कुनै सीमा हुँदैन । कलाकारहरुले आफ्नो प्रतिभा देखाउने मञ्च पाए भने जहाँ पुगेर पनि आफ्नो क्षमता देखाउन सक्छन् । केही नेपाली कलाकारहरु पनि यस्तै छन् । नेपालजस्तो सानो र अल्पविकसित मुलुकका नागरिक भएर पनि ती कलाकारहरुले अन्तर्राष्ट्रिय स्तरमा आफ्नो प्रतिभा देखाएका छन् । केही नेपाली कलाकारहरु यस्ता छन् जसले बलिउडमा पुगेर आफ्नो प्रतिभा देखाएका छन् ।

१. उदित नारायण झा

सन् १९७० मा रेडियो नेपालबाट मैथिली लोक गायकको रुपमा गायन करिअर सुरु गरेका उदित नारायण झा आज बलिउडका सफल गायकहरुमध्ये एक हुन् । उदित नारायणको जन्म नेपालको सप्तरी जिल्लामा भएको थियो । नेपाली संगीत क्षेत्रमा ८ वर्ष बिताएपछि उनी बलिउड पुगेका थिए । १९८० को दशकदेखि बलिउडमा उचाइ लिन सुरु गरेका उदितले अहिले बलिउडमा छुट्टै पहिचान बनाइसकेका छन् ।

२. मनिषा कोइराला

सुन्दर र प्रतिभाशाली अभिनेत्री मनिषा कोइरालाले पनि बलिउडमा आफ्नो छुट्टै उचाइ बनाइसकेकी छिन् । ९० को दशकमा बलिउडकी सबैभन्दा व्यस्त नायिकामध्येकी एक मनिषा पनि नेपाली हुन् । उनी पूर्व प्रधानमन्त्री बीपी कोइरालाकी नातिनी हुन् । मोडलिङ हुँदै बलिउड प्रवेश गरेकी मनिषाले दिल से, सौदागर, मन जस्ता सुपरहिट फिल्म दिइसकेकी छिन् ।

३. माला सिन्हा

माला सिन्हा क्रिस्चियन नेपाली परिवारकी छोरी हुन् । उनको परिवार पछि भारतको कलकत्तामा बसाइ सरेको थियो । बलिउडकी दिग्गज अभिनेत्री मालाले बंगाली फिल्मबाट करिअर सुरु गरेकी थिइन् । उनले नेपाली फिल्म माइतीघरमा पनि काम गरेकी छिन् । मालाले जिद, राधा का संगम, वक्त का सिकंदर, धन दौलत, बेरहम लगायतका चर्चित बलिउड फिल्ममा काम गरेकी छिन् ।

४. भोलाराज सापकोटा

रणवीर कपूर, प्रियंका चोपडा र इलियाना डिक्रुजको चर्चित बलिउड फिल्म ‘बर्फी’मा रणवीर कपूरको आवाजको रुपमा काम गर्ने अभिनेता भोलाराज सापकोटा नेपाली हुन् । मूल रुपमा नेपाली फिल्मका अभिनेता सापकोटाले यो खेलमा उत्कृष्ट सपोर्टिङ भूमिका निर्वाह गरेका थिए ।

५. पूर्णिमा श्रेष्ठ

पूर्णिमा श्रेष्ठ बलिउडकी चर्चित पार्श्व गायिका हुन् । उनलाई सुषमा श्रेष्ठको नामले पनि चिनिन्छ । उनले बाल गायिकाको रुपमा करिअर सुरु गरेकी थिइन् । नेपाली नेवार समुदायकी पूर्णिमाले माधुरी दीक्षितको आइकोनिक गीत ‘चने के खेत में’मा आवाज दिएकी थिइन् ।

६. आदित्य नारायण झा

उदितनारायण झाका छोरा आदित्य नारायण पनि बलिउडका स्थापित गायक भइसकेका छन् । बालकलाकारको रुपमा अभिनय समेत गरेका आदित्य चर्चित गायन रियालिटी शो इण्डियन आइडलका होस्ट समेत थिए ।

७. सुनील थापा

नेपाली फिल्मका चर्चित खलनायक सुनिल थापाले बलिउडका कैयौं फिल्ममा आफ्नो कला देखाइसकेका छन् । चर्चित भारतीय बक्सर मेरी कोमको बायोपिकमा मेरी कोमको कोचको भूमिका सुनिल थापाले नै गरेका थिए जसले उनको करिअरलाई छुट्टै उचाइ दिएको थियो । बलिउडमा १९८१ मा एक दूजे के लिए फिल्मबाट बलिउड प्रवेश गरेका उनले दक्षिण भारतीय फिल्ममा पनि काम गरेका छन् । सी बिक्रमको तमिल फिल्म स्केचमा पनि उनले काम गरेका थिए ।

८. तेरिया मगर

२०१४ मा चर्चित डान्सिङ रियालिटी शो ‘डान्स इण्डिया डान्स लिटिल मास्टर्स’की विजेता तेरिया नेपाली हुन् । मूल रुपले रुपन्देहीको रुद्रपुरकी तेरिया बलिउडमा स्थापित भइसकेकी छिन् । तेरियाले अर्को गायन रियालिटी शो झलक दिखला जा सिजन ९ पनि जितेकी थिइन् ।

९. झरना बज्राचार्य

१९९७ की मिस नेपाल वर्ल्ड झरना बज्राचार्यले पनि बलिउडमा आफ्नो कला देखाइसकेकी छिन् । सोनु निगमको मुख्य भूमिका रहेको फिल्म लभ इन नेपालमा झरनाले काम गरेकी छिन् । यो फिल्म २००४ मा रिलिज भएको थियो ।

१०. उषा पौडेल

नेपाली अभिनेत्री उषा पौडेलले पनि बलिउडमा आफ्नो स्थान बनाउँदैछिन् । केही नेपाली फिल्ममा शीर्ष अभिनेत्रीको रुपमा काम गरेपछि उषा बलिउड पुगेकी थिइन् । बलिउडमा उषाले तुझ संग प्रीत लगाइ सजना, जय जय जय बजरंग बली, अदालत जस्ता टेलिभिजन सिरिजमा काम गरिसकेकी छिन् । उनी मूल रुपले जनकपुरकी हुन् ।