किरण र रक्षाको ‘पर्खि बसें तिमीलाई’ पुष २७ गते प्रदर्शन हुदै

काठमाडौं / चलचित्र ‘पर्खि बसें तिमीलाई’ माघेसंक्रान्ति अबसर पारेर यहि पुषको २७ गतेबाट रिलिज हुँदैछ । रोमान्टिक लभ स्टोरी कथामा बनेको यो चलचित्रलाई दीपक श्रेष्ठले निर्देशन गरेका हुन् । नेपाली चलचित्र क्षेत्रमा २ दर्जन बढी चलचित्र निर्देशन गरेका दीपकको यो चलचित्र पनि प्रतिक्षामा छ ।

रोमान्टिक लभ स्टोरी कथामा बनेको पर्खि बसें तिमीलाईमा किरण श्रेष्ठ र रक्षा बुढाथोकी मुख्य भुमिकामा रहेका छन । नायक श्रेष्ठको यो पहिलो चलचित्र हो भने नायिका बुढाथोकीले पहिलेनै लाखे नामक चलचित्रमा अभिनय गरिसकेकी छिन । नायक श्रेष्ठसँग एक दर्जन बढी नाटकहरुमा अभिनय गरेको अनुभब छ भने बुढाथोकीले पनि थुप्रै म्युजिक भिडियोमा अभिनय गरिसकेकी छिन। गुड लुकिङसँगै थियटरको रङ्ग मञ्च मार्फत अभिनयमा निखारता ल्याउन श्रेष्ठले सात वर्ष लगाए । उनलाई यो बीचमा अभिनेता बन्ने अफर नआएको होइन तर उनले राम्रो टिम र समय पर्खिएको बताए । उनले पहिलो चलचित्र बाटै निकै सम्भावना देखाएका छन । चलचित्रको प्रचार सामाग्रीहरु हेरेकै मात्र भरमा पनि उनलाइ नयाँ चलचित्रको अफर आउन थालिसकेको छ तर किरण भने पर्खि बसें तिमीलाईको प्रदर्शन कुरिरहेका छन ।

चलचित्रमा राजाराम बुढाथोकीको लगानी छ । रोमन फिल्म र तपश्री फिल्मस् (सिक्किम)को संयुक्त व्यानरमा निर्माण गरिएको चलचित्रमा शिव श्रेष्ठ,अनिशा रसाइली, विल्सन विक्रम राई, सुनिता श्रेष्ठ लगायतका कलाकारको पनि अभिनय रहेको छ ।