काठमाडौँ । मलेसियामा एक नेपाली मेनपावर व्यवसायीको शंकास्पद मृत्यु भएको छ । शान्तिनगर काठमाडौंमा रहेको मार्भलस इम्प्लोईमेन्टका सञ्चालक ४६ वर्षीय रेन्जी राईको शंकास्पद मृत्यु भएको हो ।
४ दिन अगाडि मात्रै नेपालबाट मलेसिया निलाई भन्ने ठाउँमा गएका थिए । मलेसियामा शौचालयमा डोरीले पाँसो लगाएको अवस्थामा उनको शव फेला परेको छ । तर, खुट्टा भुईँमै छ भने डोरी समेत कमजोर क्लिपमा अड्काइएको छ ।
उनको कम्पनीमार्फत ६४ जना नेपाली कामदार मलेसिया गएका थिए । मलेसियाको स्टार डोमिन रिसर्च अन्तर्गतको ग्यान्टिन हाईलर भन्ने क्लिनर कम्पनीमा काम गर्दै आएका थिए । दुई महिना अगाडि मलेसियमा पुगेका उनीहरुले आफू समस्यामा परेको भन्दै राईलाई फोन गरेपछि उनी त्यहाँ गएको बताइएको छ ।
राईलाई मलेसियामा डिमाण्ड दिने शंकरप्रसाद आचार्य र महेन्द्रजंग शाहीले आफैं आएर समस्या समाधान गर्न भनेका थिए । आफैं नआए श्रमिकहरुलाई नेपाल फिर्ता पठाइदिने धम्की दिएका थिए । त्यसपछि राई ४ दिन अगाडि मात्रै मलेसिया पुगेका थिए । मलेसिया पुगेर तिनै श्रमिकहरुको क्याम्पमा बस्दै आएका थिए ।
बिहीबार राति ८ बजेतिर मात्र श्रीमती इन्द्रसुबा राईसँग फोनमा कुरा भएको थियो । कुरा गर्ने क्रमा इन्द्रसुबाले होटलमा बस्न आग्रह गरेकी थिइन् । तर, उनले यतै केटाहरुसँग राम्रो छ भनेर त्यतै बसेका थिए । तर, राति उनी शौचालयमा डोरीले झुण्डिएको अवस्थामा फेला परेका हुन् ।
राईको परिवारले भने उनले आत्महत्या गरेको नभई मारेर आत्महत्या जस्तो देखाउन खोजेको बताएको छ । आचार्य र शाहीले मलेसियामा बसेर नेपाली मेनपावर व्यवसायीहरुलाई कामदारको डिमाण्ड दिँदै आएका थिए ।
राईलाई पनि उनीहरुले नै दिएका थिए । उनको मृत्युपछि आचार्य र शाही भने सम्पर्कविहीन बनेका परिवारजनले बताएको छ ।
