शान्ता र चन्द्रकलाको आग्रहपछि सिधाकुराको प्रयास, दुवै चेली फर्किए स्वदेश (भिडियो)

काठमाडौँ । ६ महिना विदेशी भूमिमा बगाएको श्रमको ज्याला नपाउँदा के होला ? एकातिर श्रमशोषण अर्कोतिर रोजगारदाताको कुटपिटमा पर्दा झनै कस्तो होला ? नवलपुर, गैडाकोटकी शान्ता पाण्डेले यस्तै नियती भोग्नु पर्यो । शान्ताका बाबु मंगल प्रसादले छोरीको उद्धारका लागि ‘सिधाकुरा जनतासँग’सँग याचना गरेका थिए । यी सबै दुखः कष्ट भोगेर शान्ता कुवेतबाट नेपाल फर्किएकी छिन् ।

त्यस्तै बाँकेकी चन्द्रकला बुढाथोकीको पनि कुवेतबाट उद्दार भएको छ । उनका पति रोजगारीकै लागि साउदीमा छन् । आमा पनि विदेशमा बिचल्लीमा परेपछि चन्द्रकलाका छोराहरुले आमाको उद्दार गर्न हामीलाई भिडियो सन्देश नै पठाएका थिए । शान्ता र चन्द्रकलालाई दुबैलाई दलालले दुबई पुर्याउने भन्दै झुक्याएर कुवेत पुर्याएको थियो ।

घरेलु कामदारका रुपमा कुवेत पुर्याइएकी नवलपुर गैडाकोटकी शान्ता पाण्डे र बाँके राप्ती सोनारी गाउँपालिकाकी चन्द्रकला बुढाथोकीको उद्दार भएको छ ।

कार्यक्रम सिधा कुरा जनतासँगको पहलमा र विदेशमा बिचल्लीमा परेकाहरुको उद्दारमा सहयोग पुर्याउने अभियान्ताहरुसँगको सहकार्यमा यी दुबै नेपाली चेलीहरुको उद्दार सफल भएको हो । उद्दार भएपछि नवलपुरकी शान्ता मंगलबार र बाँकेकी चन्द्रकला बुधबार नेपाल आइपुगेका छन् ।

नवलपुरकी शान्ता पाण्डेलाई एजेण्ट रवि विकले ६ महिना अघि कुवेतको जहारा पुर्याएका थिए । तर शान्ता कुवेतमा रोजगारदाताबाट यातना पाउन थालेपछि कार्यक्रमको ९६६ औँ श्रृखंलामा उनका बूवा मंगल प्रसाद ढुंगानाले आफ्नी छोरीको उद्दारका लागि कार्यक्रमको लाइभमै आग्रह गरेका थिए । हामीले पनि शान्ताका बुवालाई उनकी छोरीलाई उद्दार गरि सकुशल नेपाल ल्याउने बाचा गरेका थियौँ ।

यो ६ महिनाको अवधीमा शान्तालाई कम्तीमा १० वटा घरमा काम गर्न लगाइयो । तर, ति घरबाट उनलाई कुनै पारिश्रमिक दिइएन । अथार्त यो ६ महिना उनले विना तलब काम गरिन् । एक महिना पुग्नै लाग्दा तलब बुझ्ने समयमा कामबाट छुटाउने र फेरी अर्को घरमा काममा लगाउने गरेको गुनासो शान्ताको छ ।

त्यस्तै बाँकेकी चन्द्रकला बुढाथोकीलाई पनि एजेण्ट रवि विकले नै घरेलु कामदारका रुपमा कुवेत पुर्याएका थिए । तर त्यहाँ चन्द्रकलाले आफ्नै रोजगारदाताबाट यातना भोग्न थालेपछि उनका दुई छोराहरुले आमाको उद्दारका लागि याचना गर्दै हामीलाई भिडियो सन्देश पठाएका थिए । त्यसपछि कार्यक्रमको ९६६ औँ श्रृखंलामा नै चन्द्रकलाका विषयमा रिपोर्ट नै प्रशारण गरेका थियौँ ।

चन्द्रकला उद्दारपछि नेपाल फर्किएकी छिन् । आफ्नी आमा आउने बाटो कुरेर बसेका छोराहरुले अब छिट्टै आमालाई भेट्न पाउने भएका छन् ।

कुवेतमा धमाधम बेचिँदै नेपाली चेली

दलालले चन्द्रकला र शान्तालाई दुबई पु¥याउने भन्दै झुक्याएर कुवेत पु¥याएको फेला परेको छ । एजेण्ट रवि विक र सरिता राउतले घरेलु कामदारका रुपमा उनीहरुलाई भिजिट भिसामा दुबई पु¥याउने बताएका थिए । तर दुबई भनेर कुवेतमा लगेर बेचिदिए । आफुलाई कुवेत पुर्याउन लागेको कुरा पीडितहरुले उड्ने दिन एयरपोर्ट पुगेपछि मात्रै थाहा पाए । दलालले उनीहरुको हातमा दुबई र कुवेतको टिकट थमाइदिएका थिए । तर, एयरपोर्टमा दुबईको टिकट च्यातेर फ्याक्नु कुवेत चाही देखाउनु भनेको थियो ।

एजेण्ट रवि विक र सरिता राउतले घरेलु कामदारको रुपमा सरकारले श्रमस्विकृति नै नदिएको मुलुकमा नेपाली कामदार पठाएर गैरकानूनी धन्दा गर्दै आएका छन् ।

रवि र सरिताले आर्कषक तलब सुविधाको प्रलोभनमा पारेर गैरकानुनी रुपमा कुवेतमा पु¥याएका कयौँ नेपाली चेलीहरु रोजगारदाताबाट चरम शोषण र यातनामा परेको पीडितहरु बताउछन् । उनीहरुले आफ्नो उद्दारमा सहयोग गर्ने सबैलाई धन्यवाद दिएका छन् ।

शान्ता र चन्द्रकला त विदेशी भूमिमा दुखः भोगेर जसोतसो नेपाल फर्किए । तर, उनीहरु जस्ता कयौँ नेपाली चेलीहरुलाई दलालहरुले दिनानूदिन श्रम स्विकृति नै नभएको मूलुकमा बेचिरहेका छन् । तर, स्वदेशमा रोजगारीको सिर्जना गर्न पनि नसक्ने र आफ्ना नागरिकलाई विदेश नजाउ भन्न सरकार भने मात्रै मुकदर्शक बनेर बसेको छ ।