पूर्व–पश्चिम लोकमार्गअन्तर्गत मोरङको सुन्दरहरैँचा नगरपालिका–८ सलकपुरमा मङ्गलबार राति भएको दुर्घटनामा परेर एक युवाको मृत्यु भएको छ । दुर्घटनामा परेर को ३५ प ५९७१ नम्बरको मोटरसाइकलका चालक २५ वर्षीय गोकुल भनिने यामबहादुर थापाको मृत्यु भएको हो । प्रदेश १ ट्राफिक प्रहरी प्रमुख एसपी सञ्जीव शर्माका अनुसार नवलपरासी गैंगाकोट–९ घर भएका थापा केही समयदेखि मोरङको सुन्दरहरैँचा–८ मा बस्दै आएको खुलेको छ ।
पश्चिमबाट पूर्वतर्फ जाँदै गरेको सडक निर्माणमा प्रयोग गरिने अनटेष्ट लोडरमा थापाले चलाएको मोटरसाइकल पछाडिबाट ठोक्किएर दुर्घटना भएको हो । एसपी शर्माका अनुसार दुर्घटनामा परेर गम्भीर घाइते भएका थापाको उपचारका लागि पुर्याएपछि मङ्गलबार राति ८:५५ बजेतिर विराटनगरस्थित कोसी अस्पतालमा मृत्यु भएको हो ।
दुर्घटनामा मोटरसाइकलको पछाडि सवार सुन्दरहरैँचा–६ गछियाका ३० वर्षीय रूपक खड्का घाइते भएका छन् । उनको अवस्था सामान्य रहेको प्रहरीले जनाएको छ । प्रहरीले लोडर चालक मोरङको कटहरी गाउँपालिका–७ का ३३ वर्षीय सरोज गौतमलाई नियन्त्रणमा लिएर घटनाको अनुसन्धान थालेको छ ।
एसपी शर्माले दुर्घटनामा परेर मृत्यु भएका मोटरसाइकल चालकसँग साथमा सवारी चालक अनुमति पत्र (लाइसेन्स) नभएको बताए । उनका अनुसार मोटरसाइकल चलाएका बेला चालकले मापसे (मादक पदार्थ सेवन) पनि गरेको पाइएको छ ।
