विराटनगरको नोबेल मेडिकल कलेजका दुई जना चिकित्सकमा कोरोना भाईरस (कोभिड–१९) को संक्रमण पुष्टि भएको छ । अस्पताल प्रशासनले दुई जना रेसिडेन्ट चिकित्सकमा कोरोना पुष्टि भएको पुष्टि गरेको छ ।
प्रदेश जनस्वास्थ्य प्रयोगशाल ल्याबमा गरिएको परीक्षणमा शनिबार उनीहरुको पोजेटिभ रिपोर्ट आएको हो । चिकित्सकमा कोरोना पुष्टि भएपछि अन्य चिकित्सक, स्वास्थ्यकर्मी तथा कर्मचारीको स्वाब संकलन कार्य भईरहेको अस्पतालले जानकारी दिएको छ । संक्रमित चिकित्सक शुक्रबारदेखि अस्पतालको आईसोलेशनमा रहेका थिए । उनीहरुको स्वास्थ्यमा समस्या देखिएपछि आईसोलेशनमा राखेर स्वाब संकलन गरिएको थियो ।
एमडीका रेसिडेन्ट चिकित्सकमा देखिएको अस्पतालका प्रबन्धक नारायण दाहालले जानकारी दिए । उनीहरुको संक्रमणको स्रोत नखुलेको उनले बताए । चिकित्सकमा कोरोना देखिएपछि अस्पतालले आइतबारदेखि ओपीडी सेवा बन्द गर्ने जनाएको छ ।
यसअघि विराटनगरको विराट नर्सिङ होम, कोशी अस्पताल, न्युरो अस्पताल, विराट मेडिकल कलेज, गोल्डेन अस्पताल, मोरङ सहकारी अस्पताल र म्याक्स अस्पतालका स्वास्थ्यकर्मी र कर्मचारीमा पनि कोरोना संक्रमण देखिएको छ ।
