काठमाडौं, जेठ ३२। राष्ट्रिय प्रजातन्त्र पार्टीका अध्यक्ष एवं पूर्वपरराष्ट्रमन्त्री डा प्रकाशचन्द्र लोहनीले महाकाली सन्धी र सीमा सम्बन्धका सन्धीहरु फरक भएकाले यसलाई एकै ठाउमा राखेर व्याख्या गर्न नमिल्ने बताएका छन् । उनले सीमा विवाद सम्बन्धमा कुरा आउँदा धेरैले महाकाली सन्धीलाई पनि जोडने गरेकाले यसलाई फरक फरक ढंगले हेर्नुपर्ने बताए ।
नेपाली रेडियो नेटवर्कको नेपाली बहशमा पत्रकार ऋषि धमलासँग कुरागर्दै अध्यक्ष लोहनीले तत्कालिन समयमा महाकाली सन्धी गर्दा दुवै देशले महाकालीको पानी उपयोग गर्दा लाभ र हानी बराबरी व्यहोर्ने गरी उक्त सम्झौता भएको खुलासा गरे । उनले महाकाली सन्धी हुँदा पनि नेपालले कालापानी लिपुलेक र लिम्पियाधुराको कुरा भारतसँग उठाएको जनाए।
महाकाली सन्धीकै समयमा यो भूमि हाम्रो हो भनेर नेपालले दावी गर्दा भारतले पत्रनै पठाएर यो भूमि तिमिहरुको हो भने हामी फिर्ता गर्छौ प्रमाण लिएर आउ भनेको तर, नेपाल सरकारले त्यो समयमा प्रमाण लिएर नगएको भन्दै भारतले पठाएको पत्र अहिले पनि नेपाल सरकारसँग सुरक्षित रहेको उनको दाबी छ ।
