जन्मदै खुट्टा थिएनन्, हात र शरीरको बलमा संसार जिते ज़ीओन क्लार्कको कथा यस्तो छ

दुई हातले दिएको सफलता — Zion Clark (ज़ीओन क्लार्क ) जन्मदै कम्मरमुनीका खुट्टा पलाएनन् । किनभने गर्भावस्थामा उनको आमाले विभिन्न थरीका लागूऔषध सेवन गरेकी थिइन् । बच्चा जन्मेपछी बुवा-आमाले उनलाई हुर्काउन चाहेनन् । उनलाई एडप्ट गर्नको लागि फोस्टर होममा छोडियो । तर १६ वर्षसम्म उनलाई कसैले आफ्नो सन्तान बनाउन चाहेनन् । त्यो अवधीमा उनले निकै दुर्व्यवहार र यातना भोगे । उनलाई बारम्बार म बाँचेर के अर्थ भन्ने लागिरह्यो । तर एक दिन Kimberli Hawkins उनको जीवनमा आमा होइन, भगवान बनेर आइन ।

उनैले उनमा आँट, सहस र विश्वास भरिदिइन् । अर्थहीन लागेको आफ्नै शरीर प्रति उनको विश्वास पलाएर आयो । जीवनमा उद्देश्य भेटे उनले । आफ्नो हात र शरीरको बलमा उनले रेसलिंग सिके । शरीरलाई बलियो बनाए । र, खुट्टाले गर्ने काम हातले गर्न थाले । उनि आफ्नो दुइ हातले सबैभन्दा छिटो दौडिएर गिनिज बुकमा नाम लेखाए । त्यो बाहेक आज उनको नाममा अरू दुई गिनिज बुक रेकर्ड कायम छ ।

आफू माथीको विश्वास र निरन्तरको अभ्यास हुने हो भने कुनै पनि अवस्थाबाट माथी उठ्न सकिन्छ भन्ने उदहारण हुन् उनि । आज उनको आँट र विश्वास लाखौंको लागि प्रेरणा बनेको छ ।