सुरिलो स्वरमा गीत गाएर सामाजिक सञ्जालमा भाइरल बागलुङकी सिम्रन परियार यतिबेला काठमाडौंमा छिन् । उनी काठमाडौं आएर रेकर्ड गराएको पहिलो गीत शुक्रवार सार्वजनिक भइसकेको छ । उनले प्रमोद खरेलको स्वर रहेको ‘उसलाई पाउन २’को फिमेल भर्सनबाट गायन यात्रा सुरु गरेकी हुन् । शुक्रवार सार्वजनिक यो गीतले युट्युबमा राम्रो भ्युज पाउँदै संगीततर्फ ट्रेन्डिङको पहिलो स्थान ओगटेको छ ।
सिम्रनले शुक्रवार नै अर्को गीतमा पनि स्वर दिइसकेकी छिन् । श्रीधर अधिकारीको संगीतमा रहेको उक्त गीत शनिवार बेलुका सार्वजनिक हुँदैछ । यतिबेला सिम्रनलाई थुप्रै गीतबाट अफर आइरहेको छ ।गीतमात्र नभएर चर्चित टेलिसिरियलबाट पनि उनलाई अभिनयको अफर आएको बुझिएको छ ।
प्रमोदको सुझाव : म्युजिक क्लास ज्वाइन गर्नु, पढाइ नबिगार्नु
प्रमोद खरेलको ठूलो फ्यान भएको बताउने सिम्रनले पहिलो गीत प्रमोदकै गाइन् । गीत रेकर्ड गराएको अर्कोदिन प्रमोदलाई भेट्ने अवसर समेत पाइन् ।
भेटघाटका क्रममा प्रमोदले सिम्रनले गाएको भिडियो आफूले हेरेको बताउँदै स्वरको प्रशंसा समेत गरेका थिए । प्रमोदले ‘राम्रो गर्नु, मेहनत गर्नु’ भन्दै सिम्रनलाई शुभकामना समेत दिए । सिम्रनलाई प्रमोदले म्युजिक क्लास ज्वाइन गर्न समेत सुझाए । ‘पढाइ अन्यन्त आवश्यक हुन्छ, पढाइलाई चाहिँ बिगार्दै नबिगार्नु होला’ प्रमोदको सुझाव थियो ‘ पढाइ र संगीत दुवैलाई संगसंगै अगाडि बढाउनुहोला भन्छु ।’
सिम्रनले प्रमोदकै अगाडि केही गीत गाएर समेत सुनाएकी थिइन् ।
