गायिका विष्णु माझीको यस वर्ष तीज गीत कस्तो आउला त ? कहाँ छिन उनि अहिले ? कुन कुन छन् उनका हिट गीतहरु ?

काठमाडौं । यस्तो लाग्छ, विष्णु माझीको गीत नभए धेरैलाई तीज ‘खल्लो’ हुन्छ । ‘चरी जेलैमा’ रिलिज गरेलगत्तै सामाजिक सञ्जालमा यस्तो चर्चा चलेको थियो । एक वर्षयता गायिका माझीले गीत ल्याएकी छैनन् ।यस वर्षको तीज पनि संघारमा छ । विष्णुले गीत ल्याउँछिन् कि ल्याउँदिनन् भन्नेमा चासो पनि उत्तिकै । निकट स्रोतले पनि गीत ल्याउनेबारे केही बताएको छैन । तर पनि फ्यान विष्णुको गीतको पर्खाइमा अधैर्य छन् ।

माझीसँग ‘सालको पात टपरी’जस्ता ब्लकबस्टर गीतमा सहकार्य गरेका कुलेन्द्र विश्वकर्मा विष्णुले तीज गीत ल्याउने कुरामा आफू आशावादी रहेको बताउँछन् । ‘मलाई लाग्छ, उहाँले गीत ल्याउनुहुन्छ,’ एक पडकास्टसँगको कुराकानीमा उनले भने, ‘दर्शक उहाँका गीतको पर्खाइमा छन् ।’

कुलेन्द्रले भनेजस्तै माझीले गीत ल्याउने कुरामा आशावादी हुन सकिन्छ । तर वर्षौंदेखि गुमनाम जीवन बाँचिरहेकी विष्णु निकट संगीतकर्मी पनि माझीले गीतको तयारी गरिरहेको बताउँछन् । जसले गर्दा यस वर्षको तीजमा पनि विष्णु माझीको आवाज दर्शकले सुन्न पाउन सक्छन् । तर लामो समयदेखि गीत नआएको कारण फ्यान अझै ढुक्क हुन सकिरहेका छैनन् ।उनीहरुको भनाइ छ, ‘विष्णुले बाहिरका गीत गाउँदिनन् । तीज गीत उनको सिग्नेचर ब्राण्ड समेत हो । यसकारण तीजमा पनि विष्णुको गीत आउने आशा राख्न सकिन्छ ।’

माझीका समकालीन समेत रहेका गायक विश्वकर्मा विगतमा विष्णुसँग सहकार्य गर्न पाउँदा आफूलाई भाग्यमानी पनि ठान्छन् । अमेरिका, युरोपबाट बीसौं लाखसम्मको अफर माझीलाई आउने गरेको प्रसंग उनले सुनाए । ‘मसँग उहाँ होइन, उहाँसँग म पछि-पछि हिंडेर कार्यक्रम गर्न सके कति राम्रो हुन्थ्यो ? अमेरिकामा एउटा स्टेज शोका लागि २० लाखसम्मको अफर पनि आएको थियो उहाँको लागि,’ कुलेन्द्रले सम्झिए ।

‘मेरा अधिकांश हिट गीत उहाँसँगै छन्,’ कुलेन्द्रले सम्झिए, ‘उहाँसँग काम गर्न पाउँदा आफूलाई भाग्यमानी ठान्छु ।’ विष्णु र कुलेन्द्रले गाएको ‘सालको पात टपरी’ लोकगीत इतिहासमा सर्वाधिक हेरिएको गीत हो ।लालुमै, बोकेझार, छिपछिपे पानीमा लेउ, चरी जेलैमा जस्ता उनका गीतलाई करोडभन्दा बढी पटक हेरिएको छ । साथै, तीजमा सर्वाधिक भाग ल्याउने गायिका पनि उनी हुन् । उनले ‘पुतलीको भट्टी’को भाग १८ सम्म ल्याएकी छन् । उनको तीज गीतमा राजेश हमालदेखि दीपाश्री निरौलासम्मले नाचिसकेका छन् ।