काठमाडौं । राष्ट्रिय फुटबल टोलीका कप्तानसमेत रहिसकेका सुजल श्रेष्ठले नेपाल छाडेर अस्ट्रेलिया पलायन हुनुअघि अन्तर्राष्ट्रिय फुटबलबाट सन्यासको घोषणा गरेका छन् ।
सुजलसँगै नेपाली राष्ट्रिय टिमबाट खेलिसकेका रन्जित धिमाल पनि बिहीबार (आज) राति १२ बजेको उडानबाट अस्ट्रेलिया जाँदैछन् । उनीहरुले बेनी एफसीबाट अस्ट्रेलियामा स्थानीय फुटबल खेल्ने बताएका छन् ।
राष्ट्रिय टिमबाट सन्यास लिएको जानकारी दिँदै सुजलले आफ्नो भविष्य र साथीहरु पनि उतै रहेकाले अस्ट्रेलिया यात्रा रोजेको अनलाइनखबरसँग बताएका छन् । उनी जारी शहीद स्मारक ए डिभिजन लिगमा साविक विजेता मछिन्द्रबाट खेलिरहेका थिए ।
सुजलले टिममा युवा खेलाडीको आमगनसँगै आफ्ना विदाइको सही समय भएको बताएका छन् । ‘मेरो लागि यो नै सन्याशको उपयुक्त समय जस्तो लाग्छ । टिममा क्षमतावान युवा खेलाडीहरु आइरहेका छन् । उनीहरुलाई पनि अवसर दिनुपर्छ भन्ने सोचेँ,’ अन्तर्राष्ट्रिय फुटबलबाट सन्यास लिनुको कारणबारे सुजलले अनलाइनखबरसँग भने ।
तत्कालका लागि अस्ट्रेलिया गएका उनले भविष्यमा नेपाल फर्केर क्लब फुटबलमा सक्रिय हुने सम्भावनालाई भने सुजलले नकारेका छैनन् । ‘क्लबस्तरमा अझै केही समय खेल्न सक्छु । उताको परिस्थिति अनुसार निर्णय गर्नेछु,’ उनले थपे ।
सन् २०११ मा पोखरा रंगशालामा भएको मैत्रीपूर्ण खेलमा मिडफिल्डर सुजलले भुटानविरुद्ध डेब्यू गरेका थिए । उनले राष्ट्रिय टिमबाट ४५ खेलमा ३ गोल गरेका छन् । सुजलले सन् २०११ को विश्वकप छनोटमा टिमोर लिस्टेविरुद्ध पहिलो गोल गरेका थिए । त्यसपछि सन् २०१६ मा एएफसी सोलिडारिटी कपको फाइनलमा मकाउविरुद्ध र १ फेब्रुअरी सन् २०२२ मा भएको मौरिससविरद्धको मैत्रीपूर्ण खेलमा पनि उनले गोल गरेका थिए ।
सुजलले सन् २०१९ मा म्यानमारविरुद्धको खेलमा सुजलले राष्ट्रिय टिमको कप्तानी पनि गरेका थिए ।
२०७६ मंसिरमा नेपालमै आयोजित १३औं दक्षिण एसियाली खेलकुदमा उनकै कप्तानीले नेपालले फुटबलको स्वर्ण रक्षा गरेको थियो । घरेलु फुटबलमा मनाङ मस्र्याङ्दीमा ९ वर्ष विताएर २ लिग उपाधि जिताउन माहत्वपूर्ण योगदान गरेका सुजल पछिल्लो तीन सिजनदेखि मछिन्द्रमा अनुबन्धित थिए । मछिन्द्रबाट पनि उनले दुईवटा लिग उपाधि जितेका छन् ।
धनकुटामा जन्मिएका सुजलले सानैदेखि फुटबल खेल्न परिवारको साथ पाएका थिए । उनले धनकुटाबाटै यू–१२ र यू–१४ को उमेर समूहका प्रतियोगिता खेलेर २०६० सालमा एन्फा एकेडेमीमा छनोट भएका थिए ।
उनले नेपालका लागि यू-१४, यू–१६, यू–१९ र यू–२३ गरी सबै टिमबाट अन्तर्राष्ट्रिय प्रतियोगिता खेलेका छन् । नेपालका पूर्व स्टार फुटबलर हरि खड्कालाई आफ्नो प्रेरणा मान्ने सुजलले सागमा कप्तानीको जिम्मेवारी पाउनुलाई आफ्नो करिअरकै गर्वको क्षण मानेका छन् ।
